Cymunedau’n Creu Cartrefi
Mae ein prosiect Cymunedau’n Creu Cartrefi yn cynnig cefnogaeth a chyngor i sefydliadau newydd a phresennol sydd am ddatblygu cynlluniau tai dan arweiniad y gymuned yng Nghymru.
Beth yw tai cydweithredol/dan arweiniad y gymuned?
Pwrpas tai cydweithredol/dan arweiniad y gymuned yw dod â phobl ynghyd i benderfynu pa fath o gartrefi a chymunedau eu bod am fyw ynddynt. Gall pobl sy’n rhannu gweledigaeth ddod ynghyd a chodi llais dylanwadol. Maent yn chwarae rôl hanfodol ar y cyd â chynghorau, datblygwyr a buddsoddwyr mewn creu cartrefi fforddiadwy sy’n diwallu anghenion cymunedau lleol.
Daw tai cydweithredol/dan arweiniad y gymuned mewn bob lliw a llun. Grwpiau bach o ffrindiau’n prynu tŷ i’w rannu, lesddeiliaid yn sefydlu pwyllgor rheoli tenantiaid, aelodau o gymuned yn prynu tir yn lleol er mwyn datblygu tai newydd arno, a phobl sydd am ddatblygu tai cynaliadwy – mae’r rhain i gyd yn enghreifftiau.
Mae gan bobl fwy o reolaeth dros ble maent yn byw, a gallant gydweithio ag eraill er mwyn cyflawni nod a rennir rhyngddynt. Cymunedau sy’n creu cartrefi.
Perchenogaeth a rheolaeth
Mae tai cydweithredol/dan arweiniad y gymuned yn cynnwys pobl leol mewn penderfyniadau ynghylch tai – ac felly mae’r canlyniadau’n fwy llwyddiannus yn aml.
- Mae cael dweud eu dweud ynghylch datblygu a rheoli tai yn meithrin ymdeimlad o rym, balchder a pherchnogaeth i’r trigolion
- Daw cymunedau’n fwy cydnerth gan ddatblygu’r galluedd i fynd i’r afael ag amrywiaeth o faterion sy’n effeithio arnynt
- Mae ymddygiad gwrthgymdeithasol yn lleihau
- Mae preswylwyr yn teimlo’n hapusach ac yn fwy bodlon am eu bod yn rhan o gymuned gefnogol
Caiff tai eu codi mewn ardaloedd lle mae angen amdanynt – yn aml mewn lleoedd na fyddai datblygwyr masnachol yn eu hystyried ar gyfer adeiladu tai.
- Bydd hyn yn gwella’r cyflenwad o dai a darpariaeth tai fforddiadwy
- Gall ardaloedd sydd wedi dirywio gael eu hadnewyddu a chaiff tai gwag eu defnyddio unwaith eto
- Gall safleoedd bach lletchwith gael eu defnyddio’n dda
- Bydd pwysau ar fannau gwyrdd yn lleihau drwy greu mannau cymunedol a rennir
- Gall mwy o bobl gael buddiannau o fod yn berchen ar dŷ, gyda rhwyd ddiogelwch gefnogol
Mae pum cam i'n cymorth:
A ydych chi erioed wedi clywed am dai cydweithredol/dan arweiniad y gymuned o’r blaen? Rydym yma i gyflwyno’r syniad a gweld a allai hyn ddatrys eich problemau tai.
Unwaith y byddwch yn gwybod rhywbeth am dai cydweithredol/dan arweiniad y gymuned, cewch ddarganfod mwy drwy ein digwyddiadau, gweithdai a chyhoeddiadau. Byddwn yn ateb eich holl gwestiynau ac yn eich cysylltu â phobl sydd â’r un meddylfryd i archwilio potensial datblygu cynllun. Mae’n bosibl y galllwch wneud cais am grant bach hyd at £2500.
Os ydych yn barod i ddechrau prosiect tai, byddwn yn cefnogi’ch grŵp i ddatblygu’r cydlyniant, y gallu a’r galluedd sydd eu hangen er mwyn ei wireddu. Gyda’n hyfforddiant mentro hanfodol, cymorth technegol a chyngor, byddwch yn barod i gymryd y camau nesaf.
Wrth i’ch cynlluniau symud ymlaen, rydym yn cynnig cymorth ychwanegol, rhwydweithiau cymorth gan gymheiriaid a strategaethau cynaliadwy er mwyn sicrhau llwyddiant i’r eithaf yn y hirdymor.
Rydych wedi cyflawni’ch gweledigaeth, ond rydym am ddweud wrth y byd am eich llwyddiant! Rydym yn comisiynu ymchwil ac yn hyrwyddo’ch stori fel y gall pobl eraill ddysgu o’ch profiad.
Datganiad fforddiadwyedd
Ariennir Cymunedau’n Creu Cartrefi gan Lywodraeth Cymru a’r Nationwide Foundation i gefnogi’r gwaith o ddarparu tai fforddiadwy a chynaliadwy sy’n cael eu harwain gan y gymuned. Er mwyn penderfynu pa gynlluniau rydym yn blaenoriaethu ein cynnig o gymorth wedi’i ariannu ar eu cyfer, rydym yn defnyddio’r diffiniad canlynol o dai fforddiadwy a gymerwyd o Bolisi Cynllunio Cymru:
“tai lle mae mecanweithiau diogel yn eu lle i sicrhau ei fod yn hygyrch i’r rhai na allant fforddio tai ar y farchnad agored, ar feddiannaeth gyntaf ac ar gyfer meddianwyr dilynol.”
Bydd fforddiadwyedd yn cael ei bennu’n fwy cadarn ar lefel leol a, phe baech yn dymuno bwrw ymlaen â datblygiad TDAG fforddiadwy, byddwn yn eich helpu i weithio gyda’r awdurdod lleol i sicrhau bod eich cynnig yn cyfateb i ofynion tai fforddiadwy eu hasesiad o’r farchnad dai leol.
Os oes gennych gynllun tai dan arweiniad y gymuned mewn golwg nad yw, naill ai’n rhannol neu’n llawn, yn bodloni’r diffiniad uchod o fforddiadwyedd, efallai y bydd ein tîm o Hwyluswyr TDAG achrededig yn dal i allu eich helpu. Cysylltwch â ni i drafod ein cyfraddau.
